HATAIZIVA

Ndikarangarira kuyemedzana kwataiita

Nevadiwa vezera tonge tichachata,

Hama neshamwari vezera zvichinge mhuri.

Kudyidzana kwedu kwaikunda dzavana buda ndibudewo mhuri

Taifamba vaviri-vaviri sehangaiwa,

Asi urongwa hweramangwana redu hwava,

Nokuti hataiziva kuti upenyu chii.

Upenyu hwandisandukira muno mudhorobha,

Nzvimbo nenzvimbo dzakati kuti ndashanya

Ndichitsvaka zvekare mufaro asi ndaushaya,

Uyo wataiva nawo pachikoro makei

Uyo wataifara zvedu pasina aiti hei!

Mukutandadzana pasina upenyu hwairongwa

Nokuti hataiziva kuti upenyu mwene wahwo.

Bvunzo dzedu takabudirira zvakanaka

Kupfuura gurumwandira revakambodzidza zvakanaka,

Kunyange zvedu taive neroparembwa

Rokushaya vadzidzisi tichizvionera.

Muzvidzidzo zvizhinji zvatairwisa nechido chokubudirira

Takarwa nebvunzo semvumba tikabudirira

Asi hataiziva zvaive zvakatimirira munyika.

Kunoti kwedu munyika tititi

Wanei ha-a! Yakasungwa neutare.

Zvakati vamwewo vakaita rombo rakanaka

Ndokupfuurira mberi nedzidzo.

Mukati mesanduko takarwadziwa nepesano pakati pedu,

Nokuti tese nevakaita rombo rakanaka

Hataiziva kuti kuparadzana kunorwadza.

Zvakazondibaya pamwoyo somunzwa

Pandakafunga kuparadzana kwangu nomudiwa,

Ndichirangarira edu mazuva newangu mudiwa,

Taive nerudo rwebhande nebhurukwa,

Shamwari dzainge hama pakutitsigira.

Pakufara kwedu taisava netariro yepesano

Nokuti hataiziva kuti upenyu injake-njake.

Nokuti upenyu injake-njake,

Munyika umwe neumwe ava kwake.

Rudo, ushamwari nomufaro zvati hwa-a.

“Shanduko chikamu muupenyu shamwari ndakainzwa,

Ikauya wakavarairwa inokurwadza somunzwa.”

Akadaro mumwe wedu kwatiri rimwe zuva

Nokuti hataiziva kuti ndozvinoita upenyu.

Zvinonzi vakamboonana havashayane,

Naizvozvo munyika tichasangana.

Vehama zvinonzi nzira masanga,

Naizvozvo munyika tichasangana.

Upenyu idanda unotozvivezera,

Saka hwedu upenyu taifanira kuzvigadzirira,

Asi zvese mupfungwa taisazviziva

Nokuti hataiziva chakanaka nechakaipa.

Kunemi vanin’ina muri kutevera,

Upenyu hunorongwa pachikoro muchadzidza.

Chitsvakai zvino makwara akanaka moatevedza,

Kana zvechikoro zvichikukundai, zvizhinji imi munokwikwidza.

Munavo vadzidzisi vanokupai ruzivo,

Mukavaremekedza vanokupai yambiro

Hamuzopindi munyika musinawo chezivo.

Kana kuzochema nairori shoko rekuti:-

Hataiziva kuti ndozvinoda upenyu.

NaNyanduri Tafadzwa Moyo
#Tipindewo Mudariro
@2017

NDIKO KUPINDANA KWAMAZUVA

Veduwe-e chisingaperi chinoshura!

Kuonana, kufara nokugara pamwe,

Kuzvitaura nhasi zvese dzenge ngano,

Zvakaenda nemisi semiti inokura,

Zuva nezuva, vhiki nemakore tinokura,

Mifaro tichifara asi zvichipfuura.

Zvisinei, chapera chapera zuva hariite nhendeshure,

Ndiko kutopindana kwamazuva.

Zvikombwe kuparadzana nehama dzepamwoyo

Kana kuparadzana neshamwari dzepamwoyo.

Kundiona ndakashurikirwa indangariro

Ndichifunga mazuva erufaro zvadzoka mundangariro.

Kuonana nhasi neshamwari angove masanga,

Nyaya dzichingove ngano dzemazuvayo tasangana,

Asi kuzvifunga zvese nhasi angove maroto

Nokuti ndiko kupindana kwamazuva.

Hama neshamwari vezera, mikohwo kuvabereki takapira,

Vabereki nemufaro usingatuvidzwi, nedzidzo upenyu vakatikagdzirira,

Tikapembedzana sehangaiwa, ramangwana tichikurukura,

Semombe mubani, munyika tapararira,

Mubishi renjake-njake, upenyu tichigadzira.

Kukura takakufarira tisingazivi kuti

Ndiko kutopindana kwamazuva.

Zvese izvi kufunga hazvichadzokorwa

Nokuti zvazuro namakei zvakatorwa.

Chishingai vezera rangu mubate nesimba,

Kwete kugarira maoko kuita tsimbe.

Pakusangana kwedu risava demberano asi mufaro,

Kudai izvi kuitira kurasa ndangariro,

Zvichidai makore achitowanda samazuva

Nokuti ndiko kutopindana kwamazuva.

Vazhinji nhasi tave neveduwo vana,

Kuchazotevera zvizukuru zvana zvevana,

Zvishoma zvishoma minhasvu igodzoka,

Kumeso makoronga paganda agokaka

Wanei ai, mangwana tobata midonzvo!

Zveujaya kuzvifunga pfungwa dzopereverwa nazvo,

Vamwe vaya tongonzwana nerunyerekupe

Hanzi ngana akashaya, ngana akazodai

Nokuti ndiko kupindana kwamazuva.

NaNyanduri Tafdzwa Moyo

#Tipndewo Mudariro

@2017

MASHOKO

Kanda zvako mashoko paunodira

Potsera zvako mafafa nemagaramoyo

Kanda zvako anenge munondo unocheka kwese

Potsera zvako unyatsobaya panyama nhete

Unei nazvo kuti anondigogona ako magaramoyo

Iwo moyo wako wakaoma sedombo!

Vhiya zvako unatsondisasika pazuva

Ndichere zvako urasire zvose zvishonhwa kwandiri

Udaro zvako ndisare ndareruka zvangu sezambuko

Udaro zvako ndisare ndangova rengenya

Unei nazvo kuti panyika ndiri munhuwo ane chiremerera

Chinodawo kuchengetedzwa kuti ndinzi munhu

Iwe uri mugonazvose asingacheuki vamwe!

Kunyange ako mashoko achinge hwenyoka uturu

Achivava senduru kana hurukuru

Uchiita ekurutsa nepamuromo pasingamhari nhunzi

Vazhinji tichisona muromo paunotaura

Nekuti zvemuvare wemashoko zvinotivhiringa

Rimwe zuva uchawana gone wakowo

Nekuti gone ana gone wakewo.

NaNyanduri Tafadzwa Moyo

#Tipindewo Mudariro @ 2017

NDINONZWA

Ndinzweiwo dzangu hama ndinonzwa

Mumboteyawo nzeve kuzvandinonzwa

Dzimwe nguva sendisiri munhu ndinonzwa

Kupera simba kunge ndoda kupepereka

Ndovhunduka zvinoti kwatara ndisina katurike.

Ngoma kurira muhana ndinonzwazve

Sendine mhosva ndomboringa-ringa

Hana yangu manhanga yombobika

Sendatarisana neshumba chikara

Ndinonzwa ndobvunda serutsanga mumvura.

Sendamwira magopwe mashoko

Anondizarira zvonditi rukurira munduri

Ndonyandura saka ndichinzi Nyanduri

Nekuti nduri ndinonzwa dzichidururwa mandiri

Saka ndinzwei mandiri mune zvandinonzwa.

Ndinonzwa zevezeve munzeve

Vataurire vateye nzeve

Ndivapakurire mupakwa wamangwana

Mangwana vasapingwa nemutanda wazuro

Zuro vakandinyira nzeve nawo vakapingwa.

Ndinzweiwo dzangu hama ndinonzwa

Mukaona ndonyandura zvimwe ndanzwa

Kurudziro yezvamakambobata zvakanaka

Nemaungira emhosho dzakamboitwa.

Zviuya zvichauya ndinonzi ndikuzivisei

Chenjedzo yekuti mucharike mitanda

Ndinonzwa zvichindisunda

Kuti nyora, nyora ramba uchingonyora!

Ndinonzwa kuti nyora, saka ndiri munyori!

NaNtanduri Tafazdwa Moyo

#Tipindewo Mudariro! @ 2017

SAHWIRA

Waroverepiko nhai sahwira?

Usipo semhou yarasa mhuru ndaidzungaira,

Wakangonyangarika seguyo rakandwa mugungwa

Ndikati zvimwe namakororo enhare wapingwa

Kana kuti dandemutande ramasaisai kwauri radimurwa

Ini ndovimba kuti zvangu zvinyorwa uchaparura.

Pandinozadzwa nenduri dzoda kunyandurwa

Ndinoshaya ndiyani wandinganyandurira.

Pandinozvimba motashungu rizere nganonyorwa

Ndinoda iwe uritumbure ndinzwe kufefeterwa

Zvirokwazvo uri mumvuri wemafemo kuturira

Unondisimbaradza mune ichi chipo

Saka ndichisuwa nguva idzo unenge usipo.

Zvinodaro nokuti tiri shiri dzimwe

Nomuririro weduzve ndomumwe

Saka ndisingadi kukushaya zuva rimwe.

Pandinonyandura unobvumirawo nenduri

Wondikurudzira kuti ndimire sanyanduri

Tochidzidzana samadzimai muduri

Ndiri kuno ndinozwa “Mabvumira Enhetembo”

Ndobva ndaziva kunobva “Mutinhimira Wedetembo”

Asi ndinoshaya mapindiro mu”Dandaro Nenhetembo.”

Paya wakavanzwa pavakati “Tipeiwo Dariro”

Sezvo vatsva vetsambo wakavapa dariro

Iwewo nhasi chidaira ndinoti “Tipindewo Mudariro!”

NaNyanduri Tafadzwa Moyo

#Tipindewo Mudariro (c) 2017

NDAITI SHAMWARI....

Ndaiti shamwari ndeuyo wandakamboona nameso

Wandinogara ndichitaura naye panhare nepawatsiapu

Ndaiti zvimwe shamwari ndeuya wandakadzidza naye kuchikoro

Kana wandakashanda naye kubasa kwemakore.

Ndaiti kuda shamwari ndewandinobata naye kukereke’yo

Kana muvakidzani wandinonzwana naye,

Ndaitizve shamwari ndeuya wandinogara ndichishanyirana naye

Anopota achindipa mari ndomuti munhu kwaye.

Ndaitiwo shamwari ndiyonini anondiyananisa nemhuri tapesana

Kana yekera wandinogara ndichinwa naye doro,

Ndaiti shamwari nditicha nhingi vaindifevha kuchikoro ndafoira

Kana Mayaya wemumugwagwa anorega ndichifamba nemota isina kukwana nerweseri

Ndaitizve shamwari ndigweta nhingi akandimiririra kuramba mhosva yandakapara

Kana mufundisi yeyo akarega ndichitorana nemudzimai wanhingi nekuti ndine dzamatsama remari

Ndaiti shamwari ndimaneja Mujubheki akandipinza basa nembudzi yandakamubhadhara

Kana dhiredhi akandipinza mune akazodhirika embanje nekuba madhiri

Ndaiti shamwari ndimukoti yeyo anondidaridza mutsetse ndanonoka kuchipatara

Kana sabhuku Vharazipi asingandishaisi keya chero ndiri muzvinabhizimusi

Asi zvino ndaona kuti idzi handi shamwari,

Ko zvino ndiani wandingati shamwari?

Ndiri mucheche zvizhinji ndakanga ndisingazivi

Asi ndakazoti ndava chimunhu, ndakaziva!

Kana zvino handisakaziva kuti shamwari chaiyo ndeipi

Asi kuzoti ndava chimunhu, ndichaziva

Kuti shamwari nd..................................

NaNyanduri Tafadzwa Moyo (c) 2017

CHIONA ZVAWAVE

Nhai Muchazviona mwana’ngu

Waive washayei chaizvo?

Wakazvirinze nyika ukati ndave chigondora

Iwe uchine mukaka pamhino,

Iwe wakarambazve kudya mabhuku,

Waiti unonotangira papi nhai mwana’ngu

Iwe wakakanda pasi mabhuku uchi mudiki?

Waona kuti mari haimuki,

Wakamutsa yako kambani,

Kambani yokuponda nokubvutira vanhu mari

Mari yamaipondera vaishaya yokukupai,

Pashure pokuvavhiringidza kuti vakupei mari.

Waiti unoenda nepiko nhai mwana’ngu?

Zvino nhasi chiona zvawave.

Wave mumaoko avo vanamugaradzakasungwa,

Waiti zvichakusvitsepiko nhai Muchazviona?

Mirimo yenyu vana inotikanga mate mukanwa.

Miromo yevakuru haiwiri pasi.

Waiuya namazakwatira ayo mari,

Mari yamaitorera nokubvutira vanhu,

Isu tikambofunga kuti zvimwe wauwana munda,

Munda unobuda goho,

Nyamba taitobata chakati tende.

Takambobvunza kuti woshanda here?

Iwe ukatenda nomuromo chete

Iwe uchiziva zvako zvauri.

Ona wakatikoromorera yeuya muNdau ngozi,

Ngozi yawakaita yokutivhimira nedemo.

Waiti zvinoguma nei nhai mwana’ngu?

Asi nhasi chiona zvawave.

Ko zvino zvawakazouraya vako baba

Nokusaziva uchiti mufambiwo zvake?

Kana iye mupfuurinanzira ndiye anganzarwo?

Zvino iwe zvowoenda kumazivandadzoka

Ndichagona kuriritira here iyi mhuri?

Mhuri yakadyirwa baba newe ka-ani!

 Kutirumisa here Muchazviona nechawakachera!

Waisaziva here kuti chivi hachieri musi wacharimwa?

Asi chitarisa uone nhasi zvawave.

NaNyanduri Tafadzwa Moyo

#Tipindewo Mudariro (c) 2017

MAZUVA AYE

Ucharangarira here mudikanwi mazuva aye?

Mazuva ataiita sechirongo nemvura,

Bhande nebhurukwa zvichitomirira kure,

Nhungo nembariro zvichisara pasi,

Taitoita dzvete-tsvete sedovi nesadza

Patainge tave kupenga narwo rudo

Pana iwo mazuva aye.

Waizivawo here nhai mudikanwi,

Kuti ndozvazvinoita pavadanani?

Yaingova tsika zvako nditsikewo

Kutakudzana bandauko renda.

Asi nhasi tongopana makotsi,

Tichinge mombe dzakapimirana.

Mudikanwi, aye aive mazuva erufaro!

Ucharangarira here riye zuva,

Zuva redu rekutanga kuonana?

Pataidanana tisingazivi kuti tinodanana,

Pataiti tikasanganidza edu meso,

Tose taiti nyechu kunyemwererana,

Pawaiti ndikakutarisa hana yorova nerudo,

Pandaitiwo ukataura mwoyo woshungurudzwa.

Meso ako ainge nyenyedzi kujeka,

Mazino achinge mukaka kuchena,

Vhudzi rwuri rusvisvi rwebani kusvibira,

Uine tsapfu dzaitaima sezuva,

Wainge uri tsikombi chaiyo.

Chokwadi ndaiti uri mwenje wangu.

Asi nhasi ndanga ndisisazviona seiko?

Vanhu vakamboedza kutiparadzanisa,

Asi vakawana rwakasungwa neutare,

Vakareva mashoko makukutu atisina kuona

Vakatenge vaikuchidzira rwedu rudo.

Kunyange nhasi mwoyo wako uri pandiri,

Asi ini ndini ndange ndafurirwa,

Asi ndazofunga kaviri zvino:-

Rudo rwedu nderwemandorokwati,

Saka ndichaedza kuti newe wega kwati

Nokuti maruva enyika haaperi,

Ukamatevedzera unoswera waputsa musha.

Kune vaya vokushaya ganda kumeso,

Ukavatevedzera vanokubata kumeso.

Chiuya zvino tidzokere kumufaro uye

Uyo wataive nawo pamazuva aye.

NaNyanduri Tafadzwa Moyo

#Tipindewo Mudariro (c) 2017

SIYANA NAVO

Ndipewo zheve nhasi mwana’ngu ndikuudze

Zvakanangana rawaveri zera nhasi uno,

Nokuti ndiyo nguva yokusarudza gwara roupenyu,

Ukasarudza rakakombama zvichakutambudza.

Vaikufarira vachakuseka wotambura,

Nokuti makonzo anoruma nokufuridzira pamwe chete.

Asi kunyange voseka zvavo sei, iwe siyana navo.

Vakange voponda iwe nunurira mupondwi,

Vakange vomukira iwe, vape dama rakanaka,

Vakange votsvaga hanzvadzi dzorudo iwe gara pasi,

Uchirodza dzako njere mukutsoropodza wakutora mwoyo

Nokuti zvokuroorana vamatongo makati pasi tsve-e.

Ndinozviziva hazvisi nyore nokuti vachakuseka,

Asi kunyange voseka zvavo sei, iwe siyana navo.

Ukaona vomberereka namakura kutsvaga ndari,

Vachiti kana vanwa vorasa misoro, mashoko vongorutsa,

Vasisagoni kutaura navamwe zvakanaka,

Vachiti kuvatsiura voda zvokumukira iwe,

Vachipota vachimbobatana huro pachavo,

Vachimboedza kuti upindewo mugwara ravo

Usanzwe, asi chaungaita kusiyana navo.

Hapano pakaoma zvino mwana’ngu nezvezera rako,

Majaya mazhinji ofarira zvokufadza nyama,

Vonge mabhuru emashanga pakurarama,

Vozvarisa gumi nefararira revasikana vose vachisiya

Vangobata mari tande kuzvipuramari!

Zvirokwazvo ndinoti rega kutorwa mwoyo nezvakadaro.

Kana vakakusekera’zvo rega kutsamwa, asi siyana navo.

Usave nyahasha kana matambanezvibhakera,

Nokuti kurwa hakugadziri zvinhu zvikanaka,

Asi kudzima moto nepeturu.

Kutaura izvi ndakabva neko kumhunga hakuna ipwa.

Ndinozviziva zvinorema nokuti kusvosva igo rinokuti ndure-e,

Kutsika chiva chichikukobora, kudenha nyuchi ichikuti ndete-e,

Asi kana ukagona izvi zvese zvichakufambira

Uchiedza kuti vakakusvosva nokukutsika unyarare,

Vakaedza kukutsamwisa kuti ugotsauka panzira tsvene,

Vape dama rakanaka rokugarisana nevamwe zvitsvene

Nokuti kugara muraini hunzwanana nevamwe.

Saka kana vakauya nomutoo upi vachikutsvaga,

Rega kuita hanya navo, asi siyana navo.

NaNyanduri Tafadzwa Moyo

#Tipindewo Mudariro (c) 2017

NGATISIMUKEI TIPINDEWO MUDARIRO!

Zvinondibaya somunzwa pakufunga mutauro weShona,

Kuti sei mhomho nhasi isina hanya neShona,

Isu tichingokurudzirwa nevakatitangira saVaHamutyinei,

Nhoroondo yezvinyorwa zveShona vakairondorodza,

Kurudziro neshuwiro zvavo vakayanika pachena,

Isu tichiramba takati uso pasi tsiki-tsiki

Setisina zvipo izvo zvakangoti matiri tekeshe.

Haiwa! Ngatisimukei tipindewo mudariro!

Makare vaiti vanzwa parira ngoma vaikotonoka,

Munzira tande kunoona zviri kuitika.

Vaona waiona vane zvipo mudariro pindikiti,

Vosimudza makumbo waiona vaoki vangoti mbikiti,

Romuromo hwa maziso angonzi mudariro ndee,

Paigodhigidzwa pasi kudzamara rukuruva rwati mone

Ipapo vaokeri vaishunguvira kupindawo wonzwa vodeedzera:

Hei! Ngatisimukei tipindewo mudariro!

Nhasi tinoti taona mufaro pakaungana mhomho,

Mwoyo inodokwairira kusvikapo nemudongo-dongo,

Kunoti pamuzinda vhu-u wanei chitaurirwa,

Pasingadanwi anonzwa akanzwa mumakuwerere,

Kunoti runopiringisha makumbo, runotsvikidza….,

Imi woye zvinenge zvichida kuzvionera pamhino sefodya.

Makwikwi amasandairira egungwa kuedza kuenderana nevamwe

Sezvo nezvikweya zvichisimuka kupindawo mudariro,

Asi mangwana wozoona dzave shasha dzedariro.

Kudai taidarowo nhasi mudariro rezvinyorwa zverurimi rwaamai,

Tichipitipidzana kupakurira vanhu nhapitapi yerurimi rwaamai,

Tokokawo vamwe kuti uyai titandare mudandaro renhetembo,

Zvino handizvo zvatiri nhasi vana vanhasi,

Takumura wedu mutauro mupfungwa sehanzu yasakara

Ndokuuti kwakadaro kupu munewevatorwa tika.

Ngatidadeiwo nerwaamai rurimi tirimo mudariro

Tikadaro vazhinji vachashunguvira kupindawo mudariro.

Mudetembo ravo ‘ChiShona Kutapira’ vaHamutyinei vanoti:

“Chishona magama anozipa kunge mana.”

Ndiyoka nhapitapi yavatisiira inozipa kunge mana.

“Tinoruda, tinoruremekedza rurimi rwedu,

Tinoruda, tinorufarira rurimi rwedu.”

Vaidaro VaHamutyinei muna ‘Chishona Kutapira.’

Hongu vairuda, vairuremekedza nokurufarira,

Asi vazhinji nhasi havarudi, havaruremekedzi kana kurufarira

Ini ndichivadaidza kuti simukai tipindewo mudariro!

Vakataura nemuti mukanwa VaHamutyinei pavakati:

“Kuda tichaonawo munyori anobva pamushana.”

Hezvi ndiripo nhasi ndinoshuva kutandadzana.

Zvizere zvipo matiri asi tinokundwa nenyadzi.

Chikotonokai mose mukunyora tizobvumirana,

Mumabvumira enhetembo dzedu nhetembo tichikandirana,

Kuzoti nenganonyorwa zvedu totandadzana.

Rurimi rweShona ingano dzematambidzanwa

Saka ngatizvikuvei kune vakatanga nevanotevera tigotambidzana

Kusvikira vakawanda vati; ngasimukei tipindewo mudariro!

Vana veZimbabwe torai zviro tikomberane gapu,

Tichiita bishi kubika nhapitapi yeShona.

Tsumo madimikira nenyaudzosingwi tizvipakire,

Pamusoro pazvo totutsira fananidzo negudziramukanwa,

Ukazozviverenga kana nzara ikaruma chikafu unokanganwa.

Zvizhinji zvirimo muShona rurimi rwaamai,

Ngatizvitutsirei tipakurire nyika iri dakunanzva

Kusvikira vazhinji vati; ngatisimukei tipindewo mudariro!

ENDA UNDOZVIONERA

Kana uchida kuona mashiripiti,

Mashiripiti akaunzwa nechirungu

Chirungu chakaputsa tsika dzedu

Tsika dzedu dzamatambidzanwa,

Enda unozvionera kudhorobha.

                                                                  

Ukapinda mudhorobha rino neroro,

Unoti kanha nezvaunoona,

Unoshama senyana reshiri ukati tumbi,

Chokwadi vanasikana vofamba vari mushwi!

Kushama sebarwe roiswa mudura,

Anoda kuzvionera mashiripiti aya,

Chokwadi anoenda onozvionera kudhorobha.

Ukazvitevedzera unofa wadzungaira,

Kudzungaira kunounzwa nechirungu,

Chokwadi chirungu chakauya nechirungurira!

Pinda mubhawa ukasati kanha,

Vanongova vaviri-vaviri sehangaiwa,

Asi rudo rwavo handi rweupenyu,

Rwavo rudo nderwechinguvana.

Zviriko zviuya zvakauiswa nechirungu,

Asi ngatizvitore pakanaka tizvikotse

Kututsira padzedu tsika dzamatambidzanwa

Kwete kuti ndiyo shanduko, yekurasa unhu nemukanwa!

Vakomana vachiremberedza mabhurukwa semwana azviitira,

Vasikanawo vachiminura zvekutaridza harare

Hanzi kufambirana nefashoni, muchipfeka zvakadaro?

Dai kuri kare zvikara zvicharura mumasango,

Masango achi maporipotyo namajaraunga,

Nyika isati yarohwa nenyundo,

Nyika isati yaita mhindupindu,

Shanduko asati auya naShandukai

Tichakadekara mune dzedu tsika

Ini ndaipururudza mupururu.

Kana uchida kunzwa yazvo mifananidzo,

Mifananidzo yezvaiitwa nevatana vedu kare

Kufamba, kutaura nekupfeka zvakatsiga,

Majaya nemhandara vachipfimbana zvakatsiga,

Kuroorana vamatongo zvichivabatsira,

Nhunzvatunzva zvadzaizivikanwa hadzaidiwa,

Enda unozvionera kumamuziyamu emuno

Kana kuzvinzwira munganonyorwa dzechinyakare.

NaNyanduri Tafadzwa Moyo

#Tipindewo Mudario (c) 2017

HAVANA RUDO

Akati vane mwoyo munyoro ndiani?

Ndiani akati vakavimbika sezuva risingapinduki mafambiro?

Mafambiro avo akaaona kururama somupuranga ndiani?

Ndiani akati vane rudo runopfachukira?

Nerudo ziendanakuenda sematenga?

Chokwadi ndechokuti havana rudo.

Munogondidzvokora semusingandizivi sei?

 Zvamunogoti kanha semusingazivi vandinoreva?

Imi nhambo dzose muchigara navo.

Ndinoreva ivavo vamunogara navo,

Navo zvino vatoti kwandiri ndee!

Zvomongoringa-ringa kutarisana, ndinoreva imi!

Chokwadi ndakazviona vakadzi hamuna rudo!

Kuramba tana asi mwoyo iri kureva,

Munoti ngei imi murimi vanamuparanzvongo!

Ndine zvikonzero dungwe rakati rongondo!

Nerimwe gore remakore eujaya hwangu,

Mumwe akandivimbisa rudo ndamuti kwenyu, hanzi mirira nguva.

Pandakazomuyeuchidza yake vimbiso akanditii?

Hanzi sori hako ndaitamba, ndave nemumwe.

Kuzoti makei ndakaona tsvarakadenga yakado mwoyo,

Mwana wevanhu kunomusvitsa rerudo shoko,

Iye tana, hanzi you are not of my level!

Ini ramutuku, rwemarevhuru handingarugoni,

Heya zverudo kuvanasikana zvoenda nemalevels!

Voda varume vane zvinhu zvavo vanasikana

Havachadi cheziya kana chekukomberana

Zvekuti angu maoko ndakasimudza saPirato.

Zuro ndizuro mumwe akaputsa hari,

Ndaiva ndoti ndazviwanira munyoro,

Mushayachishonhwa ishwa inodyiwa namambava,

Kusaziva munhoroondo yeupenyu hwake mune zvivavanzarikwa,

Akandirukira nyaya yekuvanza zvaari hanzi ndakambobhinyiwa,

Asi sezvo rinamanyanga risingaputirwi mumushunje,

Tave mumba bhegi rakabvaruka rikabudisa zvivanzarikwa.

Raiva deze rakabuda hukwana makei,

Zuru rakapinda nyoka mashambanzou,

Aiva aputsa hari nokuda kuravira gapu mbishi

Ndokusara abata chipenga chisisina chiremera.

Ukuwo mwoyo ane wakaoma sedombo,

Wakakwashararazve sebwe reman'a

Apa ruremekedzo haana ndiChipaumire!

Ndizvozvo zvikonzero muyangu hombodo,

Kutsi kwayo hombodo yemwoyo ndiko zvigere

Zviitwa zvenyu vakadzi kwatiri varume zvikukutu,

Zvazondirevesa nhasi kuti vakadzi hamuna rudo.

Ko ndiani angarambe kuti havana rudo?

NaNyanduri Tafadzwa Moyo

#Tipindewo Mudariro (c) 2017

VANAMUTUMWAPAVI

VanaMutumwapavi neSindire (SHE Practitoners and Safety)

Zvatati ngwanda-ngwanda pano tiri vanamutumwapavi,

Kundima dzedu ndiko kune nvimbovi,

Nzvimbovi idzi ndiwo mariva akamirira kutaka vashandi.

Vashandi vanoda kurumwa nzeve nesu vanamutumwapavi

Sezvo vasingazivi vachinzi ngvadzidziswe,

Ngatidzidzisei vashandi zvavari bango rokutanga remakambani.

Ngatigadzirei nvimbouya panzvimbo penzvimbovi,

Ndizvo saka tati ngwanda-ngwanda kudai saana muzvinafundo,

Kuti timbozeya zvehondo yedu nemhandu – Njodzi.

Ngatimbonyatsopenengurai nekunan’anidza hwayo unhu,

Mukazviongorora munoona kuti haina unhu,

Paya yakatifuririra umwe hunzi gurira unokurumidza kusvika,

Asi nekuti kumhanya handi kusvika

Akagurisirwa upenyu panzira asina kusvika.

Riyazve gore takava nendamba muvashandi,

Tikazonzwa yochema kutakanurwa naVaMutakiwa.

Ngatitsiurei idzi ndamba dzisazoyeuka Sindire dzatakiwa.

Nekuti tiri nharirire dzevashandi kuti vasazotakwa,

Pamwe nekuongorora njodzi dzakavavandira

Dzisati dzavataka ngatidzifumure.

Zvatiri nharirire dzevashandi isu vanamutumwapavi,

Hatiti kuraira ndamba raira yatakiwa

Asi tinokwetsura huwi yechenjedzo kuvashandi,

Kuti vatore matanho ekuzvidzivirira kunjodzi tangodziona.

Hatichamiriri kubondera sezongororo

Nekuti chakatanga ndochakatichenjedza nechekare.

Hatitenderizve mhandu kutifuta takavarirwa,

Saka ngatigarei takati kwangwa seuto raona mhandu

Yedu hondo haina sarendi seyamajarimani

Kusvikira yedu mhandu yati mbombombo.

Sindire harisi basa, asi inzira yokurarama.

Asi redu basa, kudzidzisa vanhu iyi nzira yokurarama,

Inzira yokurarama vachishanda, vasingakuvari

Nekuti zvinogoneka kushanda pasina anokuvara.

NaNyanduri Tafadzwa Moyo

# Tipindewo Mudariro (c) 2017

REGAI DZIVE SHIRI

REGAI DZIVE SHIRI

Chokwadi vanhurume vanodarireiko isu vanasikana vechidiki kutipwanya tichi mazai? Zvatichine mukaka pamhuno namapfupa matete senhinjana, vanoadii kumbotiregerawo tikakura? Zvavanotichacha tichiri majeza vanodii kumbotiregawo tasvika sedzimwe ipwa? Iwo makava epwa akambozonaka riini? Kana dai hazvo achivanakira handiti anorwarisa nenduru? Asi ivo kunyange zvakadaro vanotibata votimbunyikidza tichi vadiki. Mwoyo yavo hairwadziwo here vachibhinya isu hanzvadzi dzavo pakuberekwa? Vamwe vavo vatori vana baba kwatiri asi havaiti saana nyakubereka. Dai zvazvo vachizviita tawirirana taiti zvimwe maisokwadzo. Zvino kutivandira here musango nemune dzimwe nzvimbo dzatinoshaya rubatsiro sevanovhima mhuka? Chokwadi moyo yavo yakaoma sematombo, yakasindimara nokukwasharara semakwati emutondo.

Zvese izvi zvaingunojijana mumusoro mangu ndakabitirirwa neshungu nekuda kwezvakanga zvaitika muupenyu hwangu rimwe gore. Gore iri ndakanga ndava chimhandara choputudza, ndotanga kurongedza chipfuva zvaiyevedza. Chikuriro changu ndakanga ndadzidziswa kuzvibata ndikazvipira kuti hwangu umhandara hahungoenda zvenhando. Ndaitofanira kuzvibata nokuchengetera achazondiroora nomuchato chimanda chake. Ndakanga ndava mugwaro rechinomwe mukotoro yetatu. Vaindiona vaibvuma kuti pandiri pari kusimuka tsikombi, tsvarakadenga yemhandara. Zvino hari yakazoputsika rimwe zuva ndichibva kuchikoro. Sezvo yakanga yava kotoro yetatu mugwaro rechinomwe, takanga togadzirira mazamanishoni ekupedza dzidzo yepuraimari. Taifumobata jongwe muromo kuenda kuchikoro vamwe vasati vatanga, tichizopedza zvakare manheru vamwe vapedza kare.  Tariro yose iyi yakazomedzwa nerimwe zuva remakore ekuyaruka kwangu.

Samazuva ose, pazuva iri ndakamuka runyanhiriri ndogadzirira kuti ndiende kuchikoro. Ndapedza kupurura makumbo nekumeso, ndakapfeka rokwe rechikoro ndokudya. Ndakachizoti tande munzira ndonanga kuchikoro. Rwendo urwu rwaindisvota nekuti muraini redu ndini ndoga ndaiva mugwaro rechinomwe, saka mazuva ose ndaigaronzunzutira ndoga mangwanani nemanheru. Zvisinei, ndakaenda kuchikoro zvakaisvonaka, ndokudzidza samazuva ose. Pakaregedzwa vamwe isu vaiva mugore rechinomwe takasara tichiverenga ndokuzobuda panguva dzenhanhatu manheru. Taitozofamba kwati zvarara tichizosvika kumba ruvhunzavaeni. Ndakaparadzana nevamwe ndoti zoo nerwangu rwendo. Ko ndaizivei zvangu kuti ndakamirirwa nejambwa?

Pandakaonekana nevamwe hana yangu yakatanga kubika manhanga. Ndakanga ndotya nekuti kwakanga kwasviba, sezvo ndaisigarotsindidzwa kuti munhu wemusikana haatenderwi kufamba kwavira. Ndaiudzwa kuti pane zvakawanda zvakashata zvinogona kuitika kana ndikajairira tsika yokufamba usiku. Izvozvi ndizvo zvaiita kuti hana yangu iridze mbakumba muchipfuva changu pandainzunzutira nzira kuenda kumba kwati zvarara. Ndakatanga kumhanya ndichiteruka guvi rekubva kuchikoro ndokuriti yambu. Ndati kwidzei ndakatanga kufamba asi ndichikanda minhasvu yakati kurei. Ndaingoitira chete kuti nditi turei befu pamukwidza wokubuda muguvi umu ndozorusimudzira zvangu rwokumanya ndasvika pakateramira. Ndakazoti ndasvika pachipani chemibhondo ndokurusimudzira ndonanga mugwagwa waipfuura nemhiri kwerwizi rwaive pedo nemisha yekwedu. Pandakanga ndoona mugwagwa ndakatanga kufamba ndakadzikama. Ndaizviudza mupfungwa kuti kana ndikangoyambuka mugwagwa chete, hapachina chandichatya nekuti ndinenge ndava kumba. Kana ndikawana chinondiwana ndinokwanisa kudanidzira vekumba vakandinzwa. Ndakanga ndoona utsi hwemoto wamanheru kuti pwititi- pwititi, zvitaitai ndizvo zvaingoonekwawo nechekurwizi kuti tai-tai.

Ndiri mubutiro repfungwa kudaro ndakaerekana ndanzi dzvi nechemuno mumazamu umu. Ndakanga ndaita zvokumoneredzwa neruoko ndakatsimbirirwa maoko pamuviri. Rumwe ruoko rwakanga rwakandivhara muromo kuti ndisaridza mhere. Ndakaedza kuvhazuka ndikanzwa kuti ndakanga ndasungwa neutare chaihwo. Ndakavhura maziso zvishoma ndokutarisa ruoko rwaipfuura nepamazamu angu ndikaona riri rino zioko rinenge bango repadanga remabhiza. Ndainyatsonzwa kuti ndabatwa nehwindimukwindi yerume. Ndakaedza kuridza mhere asi hapana kwakaenda izwi rangu sezvo ndakanga ndakavharwa muromo.

Nenguva isipi ndakanzi hwetu ndikanzwa ndava mumhepo ndikatanga kukava-kava ndichiedza kutsvaka pokutsika. Ndaikava zvikwenzi nemadzinde euswa ndikaziva kuti ndaiendwa neni musango. Mushure mekanguva ndakanzwa tati pasi zhokoto. Ndakanowa nemusana ndikanzwa kudzimba kwaibva kutsoka kuchikwira nemupata wemusana kusvika mumusoro nechekugotsi uku. Ndakanzwa musoro wangu kuzeya ndokutanga kupera simba. Rume riya ndakarinzwa kugomera richinditsimbirira ruoko rwangu rweruboshwe nebvi, zioko rake rerudyi rakabva randipomba nerengenya guru rehembe kubva pamuromo richitenderedza musoro wangu nekugotsi. Ndairinzwa kufemera pamusoro, rakanga roita serasvikirwa neshavi. Rokwe rechikoro randakanga ndakapfeka rakabva rabvarurwa nemumupendero wemuchiuno umu ndikanzwa mhepo yondipinda kusina kufanira. Mushure menguva tichibidiridzana, ndakanorovera nemusoro padombo raiva pedyo nesu ndokunzwa kupera simba. Mumaziso ndakatanga kuona madzerere ndokuti rukutu ndakadaro. Hapana chandakazonzwa zvekare kunze kwemarwadzo andainzwa sekurota.

Ndakazopepuka pave paya ndopindwa nechando. Ndakavhunduka ndichiona kuti ndiri musango ndikazvishaira shumo yazvo ndokungooma muromo ndakadaro. Ndakazvitarisa ndikaona ndakashama kubva muchiuno umu zvichidzika, kumusoro mabhatani edhirezi rangu rechikoro akanga adambuka ndangoshama. Ndichingunozvitarisa kudaro ndakabva ndaona ropa rakanga raerera pasi sepabaiwa nhongo. Hana yangu yakati tigu ikatanga kubika manhanga ndikabva ndatanga kurangarira zvakanga zvaitika. Ndakaedza kusimuka ndikatadza, ndakanga ndonzwa kureruka kwandisati ndambonzwa muupenyu hwangu hwese ndikabva ndaziva kuti mbariro yeumhandara hwangu yakanga yadamburwa. Ndakaridza mhere ndichizvibonderedza pasi neshungu. Chokwadi rume iri ranga rashayei kuzochiva ndumure yakaita seni?

Vakazokoromoka vanhu vemumana mandaigara pamwe nevabereki vangu kuzoona chakanga chatora nzvimbo wanike mvura yeguchu yakanga yadeuka kare. Ndakanga ndatova zuru rapinda nyoka. Deze zvaro rabuda hukwana mashambanzou. Kunyange zvazvo nhunzvatunzva iyi yakazobatwa yaitova munhu wekuziva, haana kumbogara mujeri kana kutongwa zvafanira mhosva yake. Akashandisa mombe dzake nhatu sevharamuromo kumapurisa aichuchisa nyaya yekubhinyiwa kwangu kusvika yazongotsikwa-tsikwa. Vangu vabereki nokushaya chouviri havana kukwanisa kutsvakawo gweta rekutimiririra zvinoita vamwe. Zvakangozopera zvakaremera divi rimwe setsvimbo. Vemutemo vatinotarisira kuti vanotiyamura nekutiruramisira nyaya vadyiwa neuori, pane kuchengetedza mutemo vave kubhadharirwa nekubhadharisa kutendera kutyorwa kwawo. Ini ndini ndakagurwa kunorira, pakuongororwa ndakaonekwa ndava neutachiwana hweshuramatongo. Nguva zhinji zvino ndinogaroshushikana kuti ndiani acharima gura? Dai yaiva iyo nhamo yoga taiti zvimwe, zvino unye hwandakatapurirwa uhwu ndoita zvekudii nahwo? Chokwadi ndakabaiwa panyama nhete. Zvamune vakadzi hamugutsikani seiko nhai vanhurume? Zvamuri madzibaba kwatiri hamuna moyo wokubereka sei? Dai maizoregawozve tiyaruke kwete kutin’urun’uzha tichi majandu. Madii marega dzava shiri nokuti mazai haana muto.   

NaNyanduri Tafadzwa Moyo
# Tipindewo Mudariro (c) 2017