CHISIYA

Vanyori veChisiya
Kunyora musasiya
Musiye tsika yekusanyora
Mukasanyora pano ndinosiya.

Munoda here vaverengi vaziye?
Ngavazvizive kuti zvekunyora hatichasiya
Asi zvekusanyora ndozvatakati tiChisiya.
Chisiya zvekusanyora Chisiya!

Chisiya unodirei vaverengi vadembe?
Iwe uchigona hako kudetemba
Detemba Chisiya maungira ahwikwe kure
Kure kweChisiya ndikusina nduri
Nokuti Chisiya wakazara navanaNyanduri!

NaNyanduri Tafadzwa
#Tipindewo Mudariro © 05/2018

KANA PFUNGWA DZAKUBATA

Tinogona kutaura newe

Uchigutsurira, iwe usingatihwi!

Unogona kurova manja

Sevamwe, iwe usingandihwi!

Tinogonazve kuva pano newe

Mumhi bedzi, isu tisinewe!

Kazhinji ndozvazvinoita kana pfungwa dzakubata

Patinoseka, unosekawo mwene seunesu,

Kukuvhunza chasekwa hwava, nokuti haupo!

Neavo meso havaoni kuti haupo!

Vanotiona mumhi vanoti tiri vana,

Izvo tiri vatatu muhwedu vuna.

Sedhambakura musoro unogutsurira tichitaura,

Kuvhunza chawanzwa hwava pane zvataurwa.

Hazvitishamisi, nokuti zvinodaro kana pfungwa dzakubata.

Vanokuona vanoti unovona,

Kwavari zvakavanzika kuti hauvoni.

Vazoti pawayambuka mugwagwa vazovona,

Mota dzotsikigwa chepakati kwako kusavona.

“Harisi bofu chete asizve imatsi!”

Adaro mutyairi sezvo aridza bhera ukasahwa

Wazopatika zvino vanhu vati unga-unga

Unoita seunorota matyewe kana pfungwa dzakubata.

Rega kurega pfungwa dzichikuitisa chamunyurududu

Nokuti makununúnu maodzamoyo, anenge nduru

Akaputika anokuitisa zvisina menduru

Ukaswera wofamba chimhukutira semhute.

Pane kuti zvikudye moyo wakazvivanzarika

Durura zviri muhana kuvamwe ubatsigwe

Nokuti ndozvazvinongoda hama yangu kana pfungwa dzakubata.

NaNyanduri Tafadzwa Moyo

#Tipindewo Mudariro 

Kurume 2018

Murwizi Nyadzira

Pazibge iro, taibatapo hove kunyanya miramba/mhatye kana muvura yopera zviya iri nguva yechirimo. Ibge irori riri murwizi Nyadzira runopfuura nepedo nemusha wedu. Haguna kunyanya kukura asi hagupwi mvura. Ukaona gopwa ziva kuti mvura yava pedo, kana kuti zvokwadi kunenge kwapisa zvezhara chaiyo.

Zvino pazibge irori pakazosvika nguva yekuti pakanga poitika zvakatishaisa shumo. Takati rimwe zuva taenda kunobata hove sezvatinosingoita kana mvura yava shoma. Taisvika totanga kugofa-gofa mubako rebge iroro kuti hove dzivhiringike dzigobuda mubako. Ipapo ndipo pataizopinda totanga kubata hove nemaoko.

Zvino zuva iri takati tasvika ini nemunin'ina wangu takagofa mubako muya semazuva ose. Nenguva isipi ndakanhwa mvura kuti kumeso kwedu kuti waaa! Takati svetu ndiye chubwi chubwi ticbibuda mumvura ndomunomira kwakadaro hana dzichibika manhanga. Takanyahwaira ini mberi munin'ina achitevera maziso akawetswa tichida kuona kuti chaiva chii? Tichingosvika mvura yakanzi bvundu zvakare ichipfachurigwa kwatiri tikati tsoka wakandiisepi?

Kubva musiwo hatina kuzonobata hovepo zvakare. Asi kuti tizive kuti chii zvakakone n,anga, waingoti uchingosvikapo mvura yaibvundugwa zvokuti waishama woga. Takamboti asi pane chingwenamutope? Kana kuti waiva muramba waiva wakurisa mubako iri, asika waigoziva sei kuti vanhu vasvika regai ndichipfachura mvura?

HATAIZIVA

Ndikarangarira kuyemedzana kwataiita

Nevadiwa vezera tonge tichachata,

Hama neshamwari vezera zvichinge mhuri.

Kudyidzana kwedu kwaikunda dzavana buda ndibudewo mhuri

Taifamba vaviri-vaviri sehangaiwa,

Asi urongwa hweramangwana redu hwava,

Nokuti hataiziva kuti upenyu chii.

Upenyu hwandisandukira muno mudhorobha,

Nzvimbo nenzvimbo dzakati kuti ndashanya

Ndichitsvaka zvekare mufaro asi ndaushaya,

Uyo wataiva nawo pachikoro makei

Uyo wataifara zvedu pasina aiti hei!

Mukutandadzana pasina upenyu hwairongwa

Nokuti hataiziva kuti upenyu mwene wahwo.

Bvunzo dzedu takabudirira zvakanaka

Kupfuura gurumwandira revakambodzidza zvakanaka,

Kunyange zvedu taive neroparembwa

Rokushaya vadzidzisi tichizvionera.

Muzvidzidzo zvizhinji zvatairwisa nechido chokubudirira

Takarwa nebvunzo semvumba tikabudirira

Asi hataiziva zvaive zvakatimirira munyika.

Kunoti kwedu munyika tititi

Wanei ha-a! Yakasungwa neutare.

Zvakati vamwewo vakaita rombo rakanaka

Ndokupfuurira mberi nedzidzo.

Mukati mesanduko takarwadziwa nepesano pakati pedu,

Nokuti tese nevakaita rombo rakanaka

Hataiziva kuti kuparadzana kunorwadza.

Zvakazondibaya pamwoyo somunzwa

Pandakafunga kuparadzana kwangu nomudiwa,

Ndichirangarira edu mazuva newangu mudiwa,

Taive nerudo rwebhande nebhurukwa,

Shamwari dzainge hama pakutitsigira.

Pakufara kwedu taisava netariro yepesano

Nokuti hataiziva kuti upenyu injake-njake.

Nokuti upenyu injake-njake,

Munyika umwe neumwe ava kwake.

Rudo, ushamwari nomufaro zvati hwa-a.

“Shanduko chikamu muupenyu shamwari ndakainzwa,

Ikauya wakavarairwa inokurwadza somunzwa.”

Akadaro mumwe wedu kwatiri rimwe zuva

Nokuti hataiziva kuti ndozvinoita upenyu.

Zvinonzi vakamboonana havashayane,

Naizvozvo munyika tichasangana.

Vehama zvinonzi nzira masanga,

Naizvozvo munyika tichasangana.

Upenyu idanda unotozvivezera,

Saka hwedu upenyu taifanira kuzvigadzirira,

Asi zvese mupfungwa taisazviziva

Nokuti hataiziva chakanaka nechakaipa.

Kunemi vanin’ina muri kutevera,

Upenyu hunorongwa pachikoro muchadzidza.

Chitsvakai zvino makwara akanaka moatevedza,

Kana zvechikoro zvichikukundai, zvizhinji imi munokwikwidza.

Munavo vadzidzisi vanokupai ruzivo,

Mukavaremekedza vanokupai yambiro

Hamuzopindi munyika musinawo chezivo.

Kana kuzochema nairori shoko rekuti:-

Hataiziva kuti ndozvinoda upenyu.

NaNyanduri Tafadzwa Moyo
#Tipindewo Mudariro
@2017

NDIKO KUPINDANA KWAMAZUVA

Veduwe-e chisingaperi chinoshura!

Kuonana, kufara nokugara pamwe,

Kuzvitaura nhasi zvese dzenge ngano,

Zvakaenda nemisi semiti inokura,

Zuva nezuva, vhiki nemakore tinokura,

Mifaro tichifara asi zvichipfuura.

Zvisinei, chapera chapera zuva hariite nhendeshure,

Ndiko kutopindana kwamazuva.

Zvikombwe kuparadzana nehama dzepamwoyo

Kana kuparadzana neshamwari dzepamwoyo.

Kundiona ndakashurikirwa indangariro

Ndichifunga mazuva erufaro zvadzoka mundangariro.

Kuonana nhasi neshamwari angove masanga,

Nyaya dzichingove ngano dzemazuvayo tasangana,

Asi kuzvifunga zvese nhasi angove maroto

Nokuti ndiko kupindana kwamazuva.

Hama neshamwari vezera, mikohwo kuvabereki takapira,

Vabereki nemufaro usingatuvidzwi, nedzidzo upenyu vakatikagdzirira,

Tikapembedzana sehangaiwa, ramangwana tichikurukura,

Semombe mubani, munyika tapararira,

Mubishi renjake-njake, upenyu tichigadzira.

Kukura takakufarira tisingazivi kuti

Ndiko kutopindana kwamazuva.

Zvese izvi kufunga hazvichadzokorwa

Nokuti zvazuro namakei zvakatorwa.

Chishingai vezera rangu mubate nesimba,

Kwete kugarira maoko kuita tsimbe.

Pakusangana kwedu risava demberano asi mufaro,

Kudai izvi kuitira kurasa ndangariro,

Zvichidai makore achitowanda samazuva

Nokuti ndiko kutopindana kwamazuva.

Vazhinji nhasi tave neveduwo vana,

Kuchazotevera zvizukuru zvana zvevana,

Zvishoma zvishoma minhasvu igodzoka,

Kumeso makoronga paganda agokaka

Wanei ai, mangwana tobata midonzvo!

Zveujaya kuzvifunga pfungwa dzopereverwa nazvo,

Vamwe vaya tongonzwana nerunyerekupe

Hanzi ngana akashaya, ngana akazodai

Nokuti ndiko kupindana kwamazuva.

NaNyanduri Tafdzwa Moyo

#Tipndewo Mudariro

@2017

MASHOKO

Kanda zvako mashoko paunodira

Potsera zvako mafafa nemagaramoyo

Kanda zvako anenge munondo unocheka kwese

Potsera zvako unyatsobaya panyama nhete

Unei nazvo kuti anondigogona ako magaramoyo

Iwo moyo wako wakaoma sedombo!

Vhiya zvako unatsondisasika pazuva

Ndichere zvako urasire zvose zvishonhwa kwandiri

Udaro zvako ndisare ndareruka zvangu sezambuko

Udaro zvako ndisare ndangova rengenya

Unei nazvo kuti panyika ndiri munhuwo ane chiremerera

Chinodawo kuchengetedzwa kuti ndinzi munhu

Iwe uri mugonazvose asingacheuki vamwe!

Kunyange ako mashoko achinge hwenyoka uturu

Achivava senduru kana hurukuru

Uchiita ekurutsa nepamuromo pasingamhari nhunzi

Vazhinji tichisona muromo paunotaura

Nekuti zvemuvare wemashoko zvinotivhiringa

Rimwe zuva uchawana gone wakowo

Nekuti gone ana gone wakewo.

NaNyanduri Tafadzwa Moyo

#Tipindewo Mudariro @ 2017

NDINONZWA

Ndinzweiwo dzangu hama ndinonzwa

Mumboteyawo nzeve kuzvandinonzwa

Dzimwe nguva sendisiri munhu ndinonzwa

Kupera simba kunge ndoda kupepereka

Ndovhunduka zvinoti kwatara ndisina katurike.

Ngoma kurira muhana ndinonzwazve

Sendine mhosva ndomboringa-ringa

Hana yangu manhanga yombobika

Sendatarisana neshumba chikara

Ndinonzwa ndobvunda serutsanga mumvura.

Sendamwira magopwe mashoko

Anondizarira zvonditi rukurira munduri

Ndonyandura saka ndichinzi Nyanduri

Nekuti nduri ndinonzwa dzichidururwa mandiri

Saka ndinzwei mandiri mune zvandinonzwa.

Ndinonzwa zevezeve munzeve

Vataurire vateye nzeve

Ndivapakurire mupakwa wamangwana

Mangwana vasapingwa nemutanda wazuro

Zuro vakandinyira nzeve nawo vakapingwa.

Ndinzweiwo dzangu hama ndinonzwa

Mukaona ndonyandura zvimwe ndanzwa

Kurudziro yezvamakambobata zvakanaka

Nemaungira emhosho dzakamboitwa.

Zviuya zvichauya ndinonzi ndikuzivisei

Chenjedzo yekuti mucharike mitanda

Ndinonzwa zvichindisunda

Kuti nyora, nyora ramba uchingonyora!

Ndinonzwa kuti nyora, saka ndiri munyori!

NaNtanduri Tafazdwa Moyo

#Tipindewo Mudariro! @ 2017

SAHWIRA

Waroverepiko nhai sahwira?

Usipo semhou yarasa mhuru ndaidzungaira,

Wakangonyangarika seguyo rakandwa mugungwa

Ndikati zvimwe namakororo enhare wapingwa

Kana kuti dandemutande ramasaisai kwauri radimurwa

Ini ndovimba kuti zvangu zvinyorwa uchaparura.

Pandinozadzwa nenduri dzoda kunyandurwa

Ndinoshaya ndiyani wandinganyandurira.

Pandinozvimba motashungu rizere nganonyorwa

Ndinoda iwe uritumbure ndinzwe kufefeterwa

Zvirokwazvo uri mumvuri wemafemo kuturira

Unondisimbaradza mune ichi chipo

Saka ndichisuwa nguva idzo unenge usipo.

Zvinodaro nokuti tiri shiri dzimwe

Nomuririro weduzve ndomumwe

Saka ndisingadi kukushaya zuva rimwe.

Pandinonyandura unobvumirawo nenduri

Wondikurudzira kuti ndimire sanyanduri

Tochidzidzana samadzimai muduri

Ndiri kuno ndinozwa “Mabvumira Enhetembo”

Ndobva ndaziva kunobva “Mutinhimira Wedetembo”

Asi ndinoshaya mapindiro mu”Dandaro Nenhetembo.”

Paya wakavanzwa pavakati “Tipeiwo Dariro”

Sezvo vatsva vetsambo wakavapa dariro

Iwewo nhasi chidaira ndinoti “Tipindewo Mudariro!”

NaNyanduri Tafadzwa Moyo

#Tipindewo Mudariro (c) 2017

NDAITI SHAMWARI....

Ndaiti shamwari ndeuyo wandakamboona nameso

Wandinogara ndichitaura naye panhare nepawatsiapu

Ndaiti zvimwe shamwari ndeuya wandakadzidza naye kuchikoro

Kana wandakashanda naye kubasa kwemakore.

Ndaiti kuda shamwari ndewandinobata naye kukereke’yo

Kana muvakidzani wandinonzwana naye,

Ndaitizve shamwari ndeuya wandinogara ndichishanyirana naye

Anopota achindipa mari ndomuti munhu kwaye.

Ndaitiwo shamwari ndiyonini anondiyananisa nemhuri tapesana

Kana yekera wandinogara ndichinwa naye doro,

Ndaiti shamwari nditicha nhingi vaindifevha kuchikoro ndafoira

Kana Mayaya wemumugwagwa anorega ndichifamba nemota isina kukwana nerweseri

Ndaitizve shamwari ndigweta nhingi akandimiririra kuramba mhosva yandakapara

Kana mufundisi yeyo akarega ndichitorana nemudzimai wanhingi nekuti ndine dzamatsama remari

Ndaiti shamwari ndimaneja Mujubheki akandipinza basa nembudzi yandakamubhadhara

Kana dhiredhi akandipinza mune akazodhirika embanje nekuba madhiri

Ndaiti shamwari ndimukoti yeyo anondidaridza mutsetse ndanonoka kuchipatara

Kana sabhuku Vharazipi asingandishaisi keya chero ndiri muzvinabhizimusi

Asi zvino ndaona kuti idzi handi shamwari,

Ko zvino ndiani wandingati shamwari?

Ndiri mucheche zvizhinji ndakanga ndisingazivi

Asi ndakazoti ndava chimunhu, ndakaziva!

Kana zvino handisakaziva kuti shamwari chaiyo ndeipi

Asi kuzoti ndava chimunhu, ndichaziva

Kuti shamwari nd..................................

NaNyanduri Tafadzwa Moyo (c) 2017

CHIONA ZVAWAVE

Nhai Muchazviona mwana’ngu

Waive washayei chaizvo?

Wakazvirinze nyika ukati ndave chigondora

Iwe uchine mukaka pamhino,

Iwe wakarambazve kudya mabhuku,

Waiti unonotangira papi nhai mwana’ngu

Iwe wakakanda pasi mabhuku uchi mudiki?

Waona kuti mari haimuki,

Wakamutsa yako kambani,

Kambani yokuponda nokubvutira vanhu mari

Mari yamaipondera vaishaya yokukupai,

Pashure pokuvavhiringidza kuti vakupei mari.

Waiti unoenda nepiko nhai mwana’ngu?

Zvino nhasi chiona zvawave.

Wave mumaoko avo vanamugaradzakasungwa,

Waiti zvichakusvitsepiko nhai Muchazviona?

Mirimo yenyu vana inotikanga mate mukanwa.

Miromo yevakuru haiwiri pasi.

Waiuya namazakwatira ayo mari,

Mari yamaitorera nokubvutira vanhu,

Isu tikambofunga kuti zvimwe wauwana munda,

Munda unobuda goho,

Nyamba taitobata chakati tende.

Takambobvunza kuti woshanda here?

Iwe ukatenda nomuromo chete

Iwe uchiziva zvako zvauri.

Ona wakatikoromorera yeuya muNdau ngozi,

Ngozi yawakaita yokutivhimira nedemo.

Waiti zvinoguma nei nhai mwana’ngu?

Asi nhasi chiona zvawave.

Ko zvino zvawakazouraya vako baba

Nokusaziva uchiti mufambiwo zvake?

Kana iye mupfuurinanzira ndiye anganzarwo?

Zvino iwe zvowoenda kumazivandadzoka

Ndichagona kuriritira here iyi mhuri?

Mhuri yakadyirwa baba newe ka-ani!

 Kutirumisa here Muchazviona nechawakachera!

Waisaziva here kuti chivi hachieri musi wacharimwa?

Asi chitarisa uone nhasi zvawave.

NaNyanduri Tafadzwa Moyo

#Tipindewo Mudariro (c) 2017